ئاشکرایە یادکردنەوەى ڕاپەڕینى گەلانى ئێران، لە بەرانبەر رژیمى شادا  پێویستە، چونکە لەلایەک ئاڵ و گۆڕێکى گرینگى سیاسى لە مێژووى ئێراندا هێنایە ئاراوە و دەسەڵاتى 2500 ساڵەى شاهەنشاهى کۆتایی پێ هێنا و ستەم و درندەیی و دیکتاتۆرى تاکە کەسى شاهەنشاهى لە ناوبرد، و ماوەیێکى کەم هەل و مەرجێکى ئازاد لە ئێران جێگیر بوو، لەلایێکى دیکەوە بیرەوەرى هاتنە سەرکارى دەسەڵاتێکى، مەزهەبی ووشکە کە  ئامانجەکانى ئینتقلابی جەماوەریى لەلایەن، خومەینى و دەستەیەک ئاخوند بە فیرۆدا.

بە چاوخشاندنێک بە 29 ساڵەى دەسەڵاتى ئاخوندەکان و بە تاڵان بردنى ماف و ئازادیەکانى خەڵکى ئێران، بە روونى دەردەکەوێ خەڵکى ئێران دواى رزگار بوون لە دەسەڵاتى شاهى، کە سەرکوت و چەوسانەوەى چین و تووێژەکان و نەتەوەکانى ئێرانى گرتبوە پێش، تووش دەسەڵاتێکى دەیان جار دڕندەتر و بێ بەزەییانەتر هاتن. دەسەڵاتێک کە بەوپەڕى بێ رەحمى، ماف و ئازادیەکانى خەڵک پێشێل دەکا. پیر و منداڵ لە بەر ستەم و بێ عەداڵەتى ئەو دەسەڵاتە ئاسوودە نین.
29 ساڵە خەڵکى ئێران ئامانجى ڕاپەڕینە بەشکۆى 22ى رێبەندانیان تەنیا بە یاد کردنەوە بۆ ماوەتەوە، کە بەو ڕاپەڕینە و ئاکامەکانى بە هیوا بوون کۆتایی بە ستەم و ئازارە جۆراوجۆرەکانیان بێ. لە سایەى دەسەڵاتى ئاخوندەکانەوە کەم گەڕەک و ئاوایی هەیە، چەند کەسى بە دەستى دەسەڵاتداران ئێعدام نەکرا بێ، کەم خێزان هەیە یەکێک لە ئەندامانى لە چاڵە ڕەشەکانى دەسەڵاتداران نەبێ، کەم خانەوادە هەیە کەسێک یان چەند کەسى، خانەوادەکەى ئاوارەى دەستى ئەو رژیمە سەرکوتگەرە نەبێ.
دەسەڵاتى ئاخوندى هەژارى، گرانى، بێکارى، ماسینى ئابوورى، فەساد و بێ متمانەیی بۆ خەڵکى ئێران بە دیارى هێنا، ئێستا ئێران یەکێک لەو وەڵاتانەیە کە فەساد هەموو ناوەند و دەستگایەکى حکومەتى گرتۆتەوە و رێژەى فەساد رۆژ لە دواى رۆژ لە بەرەو سەرچووندایە.
لە ماوەى 29 ساڵ دەسەڵاتى ئاخوندى ، ئێران لە سیاسەت و کۆمەڵگەى نێودەوڵەتى تەریک کەوتۆتەوە، دەسەڵاتە ناوچەیی و غەیرە ناوچەییەکان بە چاوى گومان لە ئێران دەروانن، رژیمى ئێران بە کردەوە دزێو و ناسیاسیەکان و هەروەها دەست تێوەردان لە کار و بارى وەڵاتان واى کردوە، ئێران گۆشەگیر بکرێ و بەردەوام هەڕەشەى جیهانى لە سەر بێ. بە تاڵان بردنى سەرمایەى خەڵکى ئێران لەلایەن ئاخوندانەوە و بەخشینى بە رێکخراو و دەستە ترۆریستیەکان و خەرج کردنى لە ئاژاوەگێڕى و کڕینى چەک و چۆڵى پێش کەوتوو هەروەها هەوڵ بۆ دروست کردنى بۆمبی ئەتۆمى، بەڕادەیێک زۆرە کە هەژارى تاقەت پڕوکێن رۆژ لە دواى رۆژ خەڵکى تووشى تەنگانە کردوە.
بەو هەڵوێست و کردەوانەى دەسەڵاتداران خەڵکى ئێران دڵیان بە ئینقلاب و سەرکەوتن بە سەر رژیمى شادا خۆش، بێ گومان ئەو ئینقلابەى کە ئامانجى ئازادى و بەختەوەرى بۆ تێکڕاى چین و توێژ و نەتەوەکانى پێک هێنەرى ئێران و مەزهەب و ئایینەکانى ئەو وەڵاتە بوو بە داخەوە بووە مایەى زیان و دەرد و تۆقاندن و ئێعدام و هەڕەشە لە ئازادیخوازان و کەمایەسیە نەتەوەیی و مەزهەبیەکان.
گەلى کورد کە لە دەسەڵاتى شادا ستەمى بەرینى لێ دەکرا لە ماوەى حوکمڕانى ئاخوندەکاندا، ستەمى بێ بەزەییانە و دوور لە گشت رێ و شوێنە ئایینى و مرۆڤایەتیەکانى لێ دەکرێ، لە ماوەى دەسەڵاتى ئاخوندەکاندا، کوردستان کەوتۆتە بەر بێ رەحمانەترین هەڕەشە و سەرکوت و سەدان کەس لە رۆڵە ئازادیخوازەکانى کورد ئێعدام و هەزارانى دیکەش ئاوارە کراون. بێ گومان لەگەڵ ئەوەى کە دەبێ شادى بکەین بەبۆنەى سەرکەوتنى ڕاپەڕینى تێکڕایی و جەماوەرى خەڵکى ئێران لە دژى دەسەڵاتى شا، لە هەمانکاتدا، داخ و نیگەرانى قووڵى خۆمان لە بە تاڵان بردنى ئامانجەکان و ئاکامەکانى ئەو ڕاپەڕینە لەلایەن ئاخوندە سەرکوتگەرە ملهوڕەکانەوە دەربڕین و هەموو چین و توێژەکان لە سەرانسەرى ئێران و تێکڕاى نەتەوە و ئایین و بۆچوونەکان، تێ بکۆشین تا رژیمى ملهوڕى ئاخوندى و تاڵان کەرى ڕاپەرینى جەماوەریی ساڵى 1357ى کۆچى خۆرى بروخێ و ئازادى باڵ بە سەر ئێران و کوردستاندا بکێشێتەوە.
بە هومێدى ئەو رۆژەى ئاخوندەکان و دەسەڵاتى گەندەڵ و دژى خەڵکیان بە ڕاپەڕینى تێکڕایی جەماوەریی لە ناوبچێ و ئازادى و عەداڵەت و دیموکراسى باڵ بە سەر ئێراندا بکێشێ.

سازمانى خه بات ى كوردستانى ئيَران
22ى ريَبه ندانى 1386